هل البنت بتضخم لو لعبت حديد؟ الحقيقة الكاملة والرد العلمي على أكبر إشاعة!
هل رفع الأوزان بيخلي البنت تضخم زي الشب؟ خرافات، حقائق، وتحليل علمي شامل لهرمونات الجسم الأنثوي والعضلي
هل البنات ممكن يضخموا زي الشباب؟
كتير بنسمع جملة: “البنت إذا شالت أوزان بتصير ضخمة مثل الشب!”
خلينا نحكي بكل وضوح ونعتمد على الفهم العلمي:
❌ الإشاعة:
“ما تلعبي حديد، بتصيري زي الشب“
✅ الحقيقة:
البنت ما عندها هرمونات كافية لتضخيم العضلات مثل الشب.
الهرمون المسؤول عن الضخامة هو “التستوستيرون”، وهذا الهرمون موجود عند الشباب بنسبة عالية، لكن عند البنات بنسبة قليلة جدا.
يعني البنت حتى لو شالت أوزان تقيلة، مش رح توصل لجسم شب أبدا، لأن الأساس الهرموني مختلف.
إذا ليش بنشوف بعض البنات ضخمين؟
ببساطة:
- يا إما عندهم خلل هرموني
- أو بيستخدموا مواد ممنوعة (زي الستيرويدات)
العضلات مش ديكور… العضلات لحماية الجسم وأداءه!
في ناس لحد اليوم بفصلوا التمارين على أساس الجنس:
“البنت ما تحتاج ظهر قوي”
“خليكي بس بأرجل ومؤخرة”
لكن الحقيقة؟
هاي خرافة قاتلة!
✅ جسم الإنسان مكون من نفس العضلات… الفرق بس بالهرمونات:
- الشب: عنده تستوستيرون أعلى → قدرته على التضخيم أسرع
- البنت: عندها إستروجين أعلى وتستوستيرون منخفض → صعب توصل لحجم ضخم طبيعيا
يعني مستحيل البنت تصير زي الشب إلا إذا تدخلت بالهرمونات (ممنوعة أو صناعية)
طيب ليش ندرب كل العضلات؟
لأن العضلات مش زينة… العضلات أداء ووظيفة:
| العضلة | وظيفتها |
|---|---|
| الترابيس (Trapezius) | تحمي الرقبة، تثبّت الكتف، توازن الجزء العلوي |
| الهامسترنغ (Hamstrings) | تثبّت الركبة، تحرك الحوض، تمنع الإصابات الخلفية |
| الكالف (Calves)السمانة | توازن الجسم والمشي والقفز والتحمّل |
| الكتف | أساس حركة الذراع والتوازن العلوي للجسم |
البنت اللي بتتجاهل تمرين الجزء العلوي رح يصير عندها:
- قوام غير متناسق
- مشاكل استقامة
- ضعف عضلي بأماكن حساسة
رد واقعي على الجهل والتمييز:
في ناس بتحكي وكأنها دارسة فسيولوجيا، وبقولك: “البنت ما لازم تلعب ترابيس”
بس خليني أحكيلك:
“إنك جاهل للأسف، لأنك مش فاهم أساسيات الجسم البشري. العضلات مش موجودة للتجميل، العضلات إلها وظائف سواء بنت أو شب. نفس التمارين بتنفع للطرفين، بس الفرق بالهرمونات. الشب عنده تستوستيرون أعلى، فبضخم أسرع، أما البنت عندها إستروجين أعلى وتستوستيرون منخفض، فمستحيل توصل لحجم عضلات شب إلا إذا تدخلت بالهرمونات.
الترابيس مش عضلة ديكور، هاي بتحمي الرقبة وبتأمن الكتف. والهامسترنغ مش عضلة خلفية وبس، هي المسؤولة عن ثبات الركبة. أما الكالف، فهي جزء أساسي من توازن الجسم والحركة.
فبلاش تفتي وتفصل بين عضلات (بنات وشباب)، وركز تفهم العضلة شو بتعمل، مش شكلها كيف”
نصيحة حمزة:
“ما في عضلات بنات وعضلات شباب… في عضلات لازم تفهم وظيفتها.
التمرين مش للزينة… التمرين لحياة متوازنة وصحية!”
خلاصة:
- البنت مش رح تصير ضخمة من الحديد
- الأوزان بتقوي العضلات وبتحسن شكل الجسم
- الهرمونات هي الفارق، مش نوع التمرين
- كل عضلة إلها وظيفة… لا تحرمي جسمك من توازنه
وهاي كانت الحقيقة من الكابتن حمزة كفاوين
